Mark 9

1Wote Jisas ndi, wamp nimbᵾ kundpa nimba mel, “Na enim ik kupa ei, kundᵾp nᵾnt. Ya ila wamp mormin mbᵾ nga mat kuⱡi ralk, kont molk kᵾnangina, Got nga wamp tᵾpa mumuk rui uⱡ ronduⱡ mbᵾ, kᵾmp kum mepa omba,” nitim.

Jisas Ni Kᵾng Elpa Ti Mel Tᵾpa Kurum

2Wote, rumbᵾⱡ 6 omba puⱡnga kᵾn, Jisas ndi, Pita, Jeims, Jon kᵾn tᵾpa mepa komnga mong tila oⱡa purum. Wote, en enim kou morung. Wote, wu ni kᵾⱡ molk kandrung mel, Jisas ni, kᵾng elpa ti mel tᵾpa kurum. 3Wote, Jisas nga muⱡ nimbᵾ, eng omba kurᵾmᵾⱡa itim. Ei ya mana mᵾi kona ila wamp na ti ndi, mul mbᵾ ⱡumᵾi roⱡina, i iti natᵾtᵾm ei mel itim. 4Wote, kitip kᵾni wu raldika ni kᵾⱡ kandrung mel, Elaija kᵾn Moses raⱡ Jisas kᵾn ik nᵾtᵾng. 5Pita ndi, Jisas kundpa nimba mel, “Ik mbo wu ye! Tᵾn uⱡ kai ti ni etpᵾn ombᵾn ya ila moⱡmᵾn. Tᵾn ndi, muⱡ manga raldika kat rakpᵾn, ti nim nga, ti Moses nga, wote ti Elaija nga,” nitim. 6Pita ndi, ik i nitim, ei nga, wu kᵾⱡ ama mundmong etᵾk, ik ti ning ei nga pilik rundrᵾng.

7Wote, kupa kat omba kᵾn, wu ni kᵾⱡ tᵾpa kun rurum. Kopa nila, ik mong ti nimba mel, “Ya ei, na nga kangᵾm aⱡᵾm ei, wu ei nga ik ei, kum tiyᵾi!” nitim. 8Wote, wu ni kᵾⱡ nondpa tᵾk ropᵾl rok kandrung mel, wamp na ti, kᵾni nakᵾndrᵾng. Jisas mint en enim kᵾn murum.

9Wu ni kᵾⱡ, komnga mong nila mana orung ni kᵾn, Jisas ndi, wu ni kᵾⱡ kundpa nimba mel, “Ya enim kanmin uⱡ ni kᵾⱡ wamp na ti kundᵾk ni nᵾnᵾi mon! Pilik muⱡangina, tᵾnggᵾt Muⱡᵾⱡ Wu Kupa ei, koⱡpa tikil rom ei kᵾn, ik ei nᵾk mot ndᵾi,” nitim.

10Wu ni kᵾⱡ Jisas nga nitim ik ni, kum tek wote, en enim ik nᵾk int yant etᵾk nᵾk mel, “Koⱡpa tikil rui uⱡ ei nga puⱡ ei, namba uⱡ ti nda?” nᵾtᵾng. 11Wote wu ni kᵾⱡ ndi, Jisas waldᵾk nᵾk mel, “Nambuⱡ emel, mi ik mbo wu kᵾⱡ ndi, nᵾk mel, Elaija ei kuimp tepa omba nᵾtmin?” 12Jisas ndi, ik ei punt ropa nimba mel, “Elaija ei kupa kuimp tepa omba kᵾn, mel mbᵾ tᵾpa kun etmba. Ei nga nambuⱡ emel, Got nga rᵾnang ik kai ei ndi, nimba mel, Muⱡᵾl Wu Kupa ei, mindil mam ei nangga, wote tᵾk mbuⱡ ngok iting? 13Na enim kundᵾp nᵾnt, Buk Wingti ei ndi, wu ei nga nᵾndᵾtᵾm ni mel. Elaija ya unt urum. Wote, wamp mbᵾ ndi, namba uⱡ mat etᵾng ei nga, en enim ndi itmin nᵾk pᵾtᵾng ei mel ku etᵾng,” nitim.

Jisas Ndi, Kang Ti Kur Kit Murum Ni Etpa Titim

14Wote ok, kitip kᵾni wu kat kandrung mel, wamp ama puⱡi ndi, wu kᵾⱡ morung kona nila tᵾk pok etᵾng. Wote, ila nga mi ik mbo mat ndi, wu kᵾⱡ kᵾn, ik mat tek rombulk nᵾtᵾng. 15Wote, wamp nimbᵾ ndi, Jisas urum ila, kandᵾk, ama rut nᵾk, tᵾkrᵾk puk, rawe etᵾk tᵾtᵾng. 16Jisas ndi, elim nga kitip kᵾni wu ni kᵾⱡ, waldpa nimba mel, “Enim nambuⱡ emel, ik mura mel wu kᵾⱡ kᵾn enim?” nitim.

17Wamp minal morung nimbᵾ nga wu ti ndi, punt ropa nimba mel, “Ik mbo wu ye! Na nga kang ei kur kit rukᵾr orunga moⱡnga, ik ni nandᵾtᵾm ei nga, nim kᵾn mep ont. 18Wote, ui mat kᵾn, kur kit nga ui ei orum ei kᵾn, kang ei ropa munduⱡnga, mᵾi ila mba pelinga, keta paip mepa gu mbᵾ rᵾndᵾⱡ mong nomba. Wote kᵾng mbᵾ, ama ronduⱡ tᵾpa ngᵾngᵾn ndurum. Wote na ndi, nim nga kitip kᵾni wu kᵾⱡ, kundᵾp kur kit ei, tᵾk mundᵾi nᵾnt. Ei kᵾn wote, wu kᵾⱡ ndi, kapⱡa iti nᵾting mon!” nitim.

19Jisas ndi, ik ei pilpa, wamp nimbᵾ kundpa nimba mel, “Enim wamp mbᵾ nga mondpa pili mat mon! Na enim kᵾn moⱡᵾp, ik mbo endᵾp, namba iti endᵾt. Ui namba iti, na ndi, enim nga mbun koma rundimp? Kang ei, mek ya na kᵾn wᵾi!” nitim. 20Wote, kang ni mek, Jisas kᵾn oⱡᵾngina, wote kur kit ni, Jisas kandpa kᵾn, kang ni tᵾngᵾnda ropa munduⱡnga, mba mᵾi nila pepa purⱡi marⱡi anduⱡnga, keta paip mbᵾ, elim omba purum. 21“Nant kᵾn, kang ei uⱡ ei mel itim?” nimba, Jisas ndi, kang ei nga tipam wuldᵾtᵾm. Wu ni ndi, punt ropa nimba mel, “Ama, kor nga kang kel kᵾn itim. 22Wote, ui mat ou ndupa, kur kit ei ndi, kang ei rop kundimp nimba pilpa kᵾn, ropa tᵾpa ndip na, nu na mbila, rᵾk ndumba itim. Wote nim ndi, kapⱡa nᵾkᵾn pin ndam, nim ndi, tᵾn kont kulkᵾn tᵾkᵾn rupᵾndi,” nitim.

23Jisas ndi, nimba mel, “Wote, wamp nam ti ndi, Got kun mondpa pilim ndam, mel mbᵾ pora, kapⱡa iting mint,” nitim.

24Wote, kang ni nga tipam ndi, ka etpa mindil tᵾpa nimba mel, “Na kupa mondᵾp pᵾt ei nga, wote onunga kot kapⱡa mon. Nim ndi, na tᵾkᵾn rapundkᵾn na nga mondpa pili ei ronduⱡ nga!” nitim.

25Jisas ndi, kᵾndrᵾm mel, wamp ama puⱡi ok mᵾk rok, en enim tᵾk kum ruing elingina, kur kit ni kundpa nimba mel, “Nim keta mum kᵾn, kum ngui kur ei, na ndi nim kundᵾp nᵾnt, ‘Nim kang ei, wak rokᵾn kelkᵾn ekit ui!’ Wote aldpa okᵾn, rukᵾr pi nᵾpi mon,” nitim.

26Kur kit ni, kei nimba kang ni, ronduⱡ ropa monduⱡnga, wote kang ni, wak ropa, elim kelpa ekit urum. Kang ni, koⱡpa mel titim. Wamp mbᵾ ndi, kᵾmp kᵾm nᵾk mel, “Kang ni konum,” nᵾtᵾng.

27Wote Jisas ndi, kang ni, ki ambuⱡpa tᵾpa rapundpa, oⱡa tilinga, oⱡa ᵾnggᵾtᵾm. 28Wote Jisas ni, omba manga tila mukᵾr moⱡnga kᵾn, elim nga kitip kᵾni wu ni kᵾⱡ kᵾn mint molk, elim waldᵾk nᵾk mel, “Nambuⱡ emel, tᵾn ndi, kur kit ni, tᵾpᵾn ekit ndui nᵾndmᵾn?” nᵾtᵾng.

29Jisas ndi, punt ropa nimba mel, “Atinga rui uⱡ ila mendpᵾⱡ, kapⱡa tᵾk munding, wei uⱡ tila kapⱡa mon,” nitim.

Jisas Ndi, Elim Koⱡmba Uⱡ Ei Nga Aldpa Nitim

30Jisas kᵾn, elim nga kitip kᵾni wu ni kᵾⱡ kᵾn, kona ni, wak rok rᵾk, Galili kona ila purung. Wamp na ti ndi, Jisas elim murum kona ei pili nᵾpᵾleing nimba pitim. 31Ei nambuⱡ emel, ui ei kᵾn, elim nga kitip kᵾni wu kᵾⱡ, ik mbo inditim. Ik mbo endpa ei nimba mel, “Muⱡᵾl Wu Kupa ei, tᵾk wu kat ngangina kᵾn, rok kunding. Wote, rumbᵾⱡ raldika omba pangga, elim ⱡoporpa kont moⱡmba,” nitim.

32Wote, wu kᵾⱡ ik mbo inditim ei nga puⱡ ei, pilik kun iti natᵾtᵾng. Wote, elim wuldᵾng ei nga mundmong etᵾng.

Wu Nuim Kuimbal Ei Nam?

33Wu ni kᵾⱡ Kaperniyum kona ok kᵾn, manga tila mukᵾr puk moⱡina, Jisas ndi, elim nga kitip kᵾni wu ni kᵾⱡ waldpa nimba mel, “Enim namba mel ti nga nombuⱡa mam ila, ik ou nduk nᵾk onmᵾn?” nitim.

34Wote, wu ni kᵾⱡ ndi, Jisas punt rok ik ti, ni nandᵾtᵾng. Ei nambuⱡ emel, nombuⱡa mam nila, en enim ndi, ik palk nᵾk, en enim nga wu nuim kuimbal ei, nam moⱡmba nᵾtᵾng. 35Wote Jisas ni, mana moⱡpa, kitip kᵾni wu 12 ni kᵾⱡ, wi ropa rukᵾr tᵾpa kundpa nimba mel, “Wote, wu nam ti, kuimbal muⱡimp nimba pilim ndam, wu ei omba, akil tepa wamp mbᵾ nga pora, kindmant wamp moⱡmba,” nitim. 36Wote Jisas ndi, kangambuⱡa ti tᵾpa kᵾn, en enim nga kuimp keta nila oⱡa mondpa. Elim nga ki ni raⱡ ndi, kangambuⱡa ni kanggilpa kᵾn, wu ni kᵾⱡ kundpa nimba mel, “Wamp nam ti ndi, na nga mbi ila nga nimba, kangambuⱡa kᵾⱡ nga ti, rawe etpa tᵾm ndam, na rawe etpa tᵾmba. Wote, wamp nam ti ndi, na rawe etpa tᵾm ndam, ei na mint mon. Ei, wu nam ti, na tᵾpa mundrum wu ei, kunda ku rawe etpa tᵾmba,” nitim.

Wamp Nam Ti Ndi, Tᵾn Tᵾpa Pe Mundi Namᵾndᵾmba

38Jon ndi, Jisas kundpa nimba mel, “Ik mbo wu ye! Tᵾn wu ti kᵾndᵾrmᵾn ei ndi, kur kit mbᵾ, nim nga mbi ila nga nimba tᵾpa mundrum. Ei nga, tᵾn ndi wu ei, kundpᵾn iti nᵾtangga mon! Ei nambuⱡ emel, wu ei tᵾn nga rᵾⱡaip ila mon,” nitmin. 39Jisas ndi, kundpa nimba mel, “Wu ei mon ni nᵾnᵾi! Wote, wamp na ti ndi, uⱡ rᵾpndi mat na nga mbi ila em ndam, wote na kᵾn ik kit mat tᵾkrᵾpa ni nanᵾmba. 40Wamp nam ti ndi, tᵾpa pei mundi namᵾndᵾmba wamp ei, wamp tᵾn nga. 41Ik kupa ei, enim kundᵾp nᵾnt. Wamp nam ti ndi, enim kandpa kᵾn, enim Kraist nga wu kᵾⱡ nimba, nu kuⱡpa ngum ndam, wamp ei nga tᵾpa rapᵾndᵾm uⱡ ei, mana pi napᵾmba. Got ndi, mel ti punt ropa ngumba,” nitim.

Uⱡ Kit Mbila Oⱡa Tᵾpa Kandrᵾm

42“Wote, wamp nam ti ndi, mondᵾk pili kangambuⱡa kᵾⱡ kᵾn, uⱡ kit mat itangina kᵾn, na kᵾn mondᵾk pᵾtmᵾn uⱡ ei, wak rong ndam, ku mam ti tᵾk, wamp ei nga nuim kan ila komnga kulk, rok tᵾk num kuta ila mana ndung ndam, kapⱡa. 43Ei nga, nim nga ki ei ndi, uⱡ kit mat etpa, nim nga mondpa pili ei, etpa kit mondum ndam, ki ei koⱡmung etkᵾn mundi! Wote, nim ki tenda mint tekᵾn molkᵾn, uⱡ nga kona ila kont muⱡᵾn ei ndi, kapⱡa etmba. Wote, nim ki raⱡ, kunda tekᵾn, mbi paka ndam, nim ndip kumbᵾⱡi nambrᵾm ndip ila pin. 44[Ya kona ila kora mong kora kel kel mat mormin mbᵾ, kuⱡi nakᵾrmin. Wote ndip ei, kumbᵾⱡi nambrᵾm ku]. 45Wote, nim nga kᵾmp ei ndi, uⱡ kit mat etangga kᵾn, nim nga mondpa pili orunga, etpa kit mondum ndam, kᵾmp ei koⱡmung etkᵾn mundi! Nim kᵾmp tenda mint tekᵾn molkᵾn, uⱡ nga kona ila kont muⱡᵾn ei ndi kapⱡa etmba. Muna, nim kᵾmp raⱡ pikᵾ tekᵾn mbi paka ndam, ndip kumbᵾⱡi nambrᵾm ndip kona ila pin. 46[Ya kona ila kora mong, kora kel kel mat mormin mbᵾ, kuⱡi nakᵾrmin. Wote ndip ei kumbᵾⱡi nambrᵾm ku.] 47Wote, nim nga mong ei ndi, uⱡ kit mat etangga kᵾn, nim nga mondpa pili orunga etpa kit mondum ndam, mong ei, akᵾkᵾn tᵾkᵾn mundi! Nim mong tenda mint tekᵾn molkᵾn, Got nga wamp tᵾpa mumuk rui kona ila pin. Nim nga mong raⱡ kᵾmp kᵾm tekᵾn, mbi paka ndam, nim ndip kona ila pin. 48Ya kona ila,

‘Kora mong kora kel kel mat mormin mbᵾ, kuⱡi nakᵾrmin. Wote ndip ei, kumbᵾⱡi nambrᵾm ku,’ nitim.
49Ndip ei ndi, wamp mbᵾ kᵾn pora mba ei, ip kuta etᵾm ei mel ku. 50Ip kuta ei mel kai. Wote, ip ei nga tᵾngᵾn ei, nu em ndam, wote nim ndi, ip ei nga tᵾngᵾn ei, aldpa etkᵾn, yant tin mel nant? Nim ndi, wamp na mbᵾ kᵾn, ip kuta na, ol orum ei mel uⱡ kai, wamp numan wang nduk uⱡ mbᵾ mint etᵾk, wamp mbᵾ kᵾn numan wang nduk muⱡᵾi!” nitim.